Björn Leví Gunnarsson, þingmaður Pírata, hefur opnað vefsvæði sem er vettvangur undir sögur um spillingu á Íslandi. Getur hver sem er sett þar inn nafnlaust efni. Björn skrifar um þetta tiltæki á Facebbook:
„Þekkir þú sögur um spillingu, og þá sérstaklega hótanir?
Ég ákvað, eftir Silfurþáttinn í morgun, að setja saman litla síðu þar sem hægt er að koma á framfæri sögum af hótunum og spillingu almennt. Þetta er svona í anda #metoo að vissu leyti þar sem þetta er algerlega nafnlaust. Markmiðið er að fá hugmynd um umfang þeirrar menningar sem var afneitað í Silfrinu.
Hver og einn getur sent inn fleiri en eina tilkynningu. Engum upplýsingum um sendanda er safnað.“
Á vefnum er form til að setja inn efni og þar er jafnframt þessi inngangur:
„Þekkir þú sögu um hótanir á Íslandi? Til dæmis vinnuveitandi að gefa í skyn að flokksmenn einhvers stjórnmálaflokks séu ekki velkomnir eða samkeppnisaðili að monta sig af valdamiklum vinum? Ef svo, vinsamlegast gefðu þér smá tíma til þess að skrifa stutta lýsingu af reynslu þinni. Vinsamlegast hafðu söguna þína nafnlausa.“