Samkvæmt tillögu meirihluta fjárlaganefndar Alþingis verða framlög til meðferðarkjarna Nýs Landspítala lækkuð um 3,5 milljarða á næsta ári. Framkvæmdastjóri Nýs Landspítala segir að ráð sé gert fyrir að meðferðarkjarninn verði tilbúinn árið 2024 þrátt fyrir þessa boðuðu lækkun.

Fréttablaðið skýrir frá þessu.

„Það er ekki gert ráð fyrir öðru en að meðferðarkjarninn verði tilbúinn sem byggingarframkvæmd árið 2024 eins og áætlanir segja til um.“

Hefur blaðið eftir Gunnari Svavarssyni, framkvæmdastjóra Nýs Landspítala. Hann sagði einnig að þrátt fyrir að þessi lækkun komi til sé gert ráð fyrir um fimm milljarða króna framlagi til uppbyggingarinnar á Hringbraut á næsta ári sem sé hæsta fjárlagaheimildin til þessa. Haft er eftir honum að lækkunin á næsta ári skýrist af að ákveðið hafi verið að fullvinna grunn byggingarinnar áður en næsti verktaki hefur störf. Einnig sé unnið að jarðvinnu vegna bílakjallara við hlið byggingarinnar, undir Sóleyjartorgi.

„Þetta hefur í för með sér að uppsteypa meðferðarkjarnans og önnur jarðvinnuverkefni hliðrast til á árinu 2020. Áhrifin á sjóðstreymisáætlun verða um þrír milljarðar með fyrirvara um heimild til útboðs og samninga vegna uppsteypuhluta verksins. Jarðvinna vegna rannsóknarhússins mun líka hliðrast til á árinu.“

Er haft eftir Gunnari.

Gert er ráð fyrir að framkvæmdirnar nái hámarki á árunum 2021-2022.  Heildarkosnaður við verkið er áætlaður um 58,5 milljarðar.