Ekkert liggur fyrir í því að leki hafi borist úr Seðlabankanum til fréttamanns RÚV vegna húsleitar bankans hjá Samherja árið 2012. Þetta kemur fram í yfirlýsingu frá Seðlabankanum, þar sem bankinn telur réttast að málið verði rakið fyrir dómstólum.
Þorsteinn Már Baldvinsson, forstjóri Samherja, sakaði RÚV í morgun um að hafa verið gerenda í málinu, þar sem fréttamenn RÚV hafi verið mættir á skrifstofur Samherja áður en húsleitarmenn Seðlabankans voru mættir þangað árið 2012, en þá var Már Guðmundsson seðlabankastjóri. Hefur Þorsteinn Már gagnrýnt Má harðlega æ síðan.
Sagði Þorsteinn í morgun að um væri að ræða eina ruddalegustu húsleit sem gerð hafi verið hér á landi og sakaði hann RÚV um að hafa „búið til glæp“ með athæfi sínu. Svaraði formaður Blaðamannafélags Íslands Þorsteini um hæl og sagði ásakanir hans fráleitar.
Sjá nánar: Hjálmar hjólar í „fráleitan“ Þorstein Má –„Fjársterkir aðilar verða að sætta sig við það“
Í yfirlýsingu Seðlabankans er vísað í rannsókn innri endurskoðanda Seðlabankans, sem fólust í tölvupóstssendingu frá fréttamanni RÚV degi áður en húsleitin fór fram. Þeim pósti var ekki svarað af hálfu Seðlabankans og því ekkert sem bendir til þess að lekinn hafi borist þaðan, að sögn Seðlabankans.
Yfirlýsingin er svohljóðandi:
Um meintan gagnaleka
Eins og komið hefur fram í fjölmiðlum hefur rannsókn innri endurskoðanda Seðlabankans leitt í ljós að starfsmaður Seðlabankans og fréttamaður Ríkisútvarpsins áttu í samskiptum áður en húsleit fór fram hjá Samherja hf. og tengdum aðilum. Nánar tiltekið fólust samskiptin í því að fréttamaðurinn sendi uppkast að frétt með tölvupósti þar sem húsleitarinnar var getið – daginn áður en hún fór fram. Rannsókn bankans sýndi hins vegar að þessum pósti var ekki svarað. Það er því ekkert sem liggur fyrir um að upplýsingum hafi verið lekið frá Seðlabankanum enda ljóst að téð húsleit var á vitorði margra. Forsætisráðuneytið upplýsti lögreglu um niðurstöður rannsóknar Seðlabankans hvað þetta varðar án þess þó að í því hafi falist nokkur efnisleg afstaða eins og fram kemur í bréfi ráðuneytisins.
Málið er litið mjög alvarlegum augum af hálfu Seðlabanka Íslands. Innan bankans hefur allt verið gert til þess að upplýsa það. Forsætisráðherra og bankaráði Seðlabankans var greint frá niðurstöðum rannsóknar innri endurskoðunar. Seðlabankinn telur jafnframt eðlilegt að forsætisráðuneytið hafi upplýst lögreglu um þessa sömu niðurstöðu.
Jafnframt hefur forsvarsmönnum Samherja verið greint frá niðurstöðum rannsóknar innri endurskoðunar. Þau bréf sem vitnað hefur verið til í fjölmiðlaumræðu eru málskjöl sem Seðlabankinn hefur að eigin frumkvæði lagt fram í því skaðabótamáli sem höfðað hefur verið vegna málareksturs bankans á hendur Samherja hf.
Að öðru leyti telur Seðlabankinn rétt að frekari umfjöllun um málið eigi sér stað undir rekstri málsins hjá dómstólum.
