Fréttablaðið skýrir frá þessu í dag. Fram kemur að birgðirnar séu um 150 tonnum meiri núna en í lok ágúst á síðasta ári og hafi ekki verið svona miklar síðan 2016. 490 krónur fengust fyrir hvert kíló sem hefur verið selt úr landi það sem af er ári.
„Útflutningur á mjólkurvörum frá Íslandi verður seint til þess að borga sig. Markaðir í Evrópu eru fullir og verðlag á Íslandi með þeim hætti að það er tiltölulega dýrt að stunda framleiðslu hér, hvaða nafni sem hún nefnist.“
Er haft eftir Arnari Árnasyni, formanni Landssambands kúabænda sem sagði að framleiðslan innanlands sé heldur meiri en þörf er á hverju sinni til að hægt sé að sinna innanlandsmarkaðinum. Smjör sé flutt út til að viðhalda jafnvægi.
Eitt kíló af smjöri kostar um þúsund krónur úti í búð og því fæst um helmingi lægra verð fyrir kílóið þegar smjör er selt til útlanda.
„Það er ákveðin útf lutningsskylda og við erum að takast á við þá skyldu. Við sjáum á þessari stöðu að það var heillavænlegt af bændum að halda í kvótafyrirkomulagið til þess að missa ekki framleiðsluna út í vitleysu. Það hefði ekki verið til hagsbóta fyrir íslenska bændur að missa framleiðslustýringuna.“
Er haft eftir Arnari.
