Ásgeir Margeirsson, forstjóri HS Orku, hefur gert samkomulag við stjórn fyrirtækisins um að flýta áður ákveðnum starfslokum sínum, en hann lét af störfum í gær. Settur forstjóri tímabundið er Finnur Beck, lögfræðingur fyrirtækisins. Þetta kemur fram á vef HS Orku:

Stjórn HS Orku hf. hefur að ósk fráfarandi forstjóra gert samkomulag um að flýta áður ákveðnum starfslokum og lætur hann formlega af störfum í vikunni. Stjórnin hefur falið Finni Beck, lögfræðingi félagsins, að gegna stöðu forstjóra tímabundið þar til nýr hefur verður ráðinn. Staða forstjóra HS Orku var sem kunnugt er auglýst til umsóknar í byrjun september. Ráðningarferli stendur yfir og er gert ráð fyrir að því ljúki á næstu vikum.

Finnur Beck hefur starfað sem aðallögfræðingur HS Orku frá árinu 2015 en var þar áður starfandi héraðsdómslögmaður og einn eigenda á Landslögum lögmannsstofu. Finnur útskrifaðist með ML gráðu úr lögfræði frá Háskólanum í Reykjavík árið 2010 en hann er jafnframt með BA gráðu í stjórnmálafræði frá Háskóla Íslands ásamt því að vera meðlimur í Karlakórnum Esju.