Samkvæmt nýrri breskri rannsókn eru þeir sem nota rafrettur tvöfalt líklegri til þess að hætta að reykja hefðbundnar sígarettur, heldur en þeir sem kjósa að notast við nikótínplástra- og tyggjó.

Alls 900 manns tóku þátt í rannsókninni, sem áttu það sammerkt að hafa reykt lengi en vildu hætta með aðstoð heilbrigðisyfirvalda. Breskum og bandarískum sérfræðingum greinir þó nokkuð á varðandi niðurstöðuna. Þeir bresku segja að niðurstaðan komi ekki á óvart, þeirra reynsla sé að sígarettureykingar hafi dregist saman með tilkomu rafretta, meðan bandarískir sérfræðingar telja rafrettur leiða til nikótínfíknar og verði til þess að yngri aldurshópar dragist að reykingum, jafnvel börn. RÚV greinir frá og vitnar í The Guardian.

Þátttakendur rannsóknarinnar fengu ýmist rafrettur, plástra, tyggjó eða sprey frá sérfræðingum til þess að hætta að reykja. Eftir eitt ár höfðu 18 prósent þeirra sem notuðu rafrettur, látið af reykingum, en aðeins um 10 prósent þeirra sem notuðu hin hjálpartækin.

Sagt er að þetta sé fyrsta rannsóknin sem gerð hafi verið þar sem rafrettur eru bornar saman við önnur meðul sem notast er við í baráttunni gegn nikótínfíkninni.

Bannað að auglýsa

Ný lög um rafrettur og áfyllingar þeirra taka gildi þann 1. mars næstkomandi. Lagt er til að settar verði reglur um innflutning, sölu, markaðssetningu og notkun á rafrettum og áfyllingum fyrir þær. Gert er ráð fyrir að bannað verði að selja eða afhenda ungmennum yngri en 18 ára slíkar vörur auk þess sem þeim yrði óheimilt að selja þær.

Lagt er til að bannað verði að selja þær í skólum og á öðrum stöðum sem ætlaðir eru til félags-, íþrótta- og tómstundastarfs barna og ungmenna og þar sem heilbrigðisþjónusta er veitt. Jafnframt er lagt til að bannað verði að nota rafrettur á þeim stöðum þar sem tóbaksnotkun er þegar bönnuð.

Gert er ráð fyrir að Neytendastofa hafi eftirlit með öryggi varanna og merkingum til að lágmarka hættu á slysum við notkun þeirra og tryggja að rafrettur og áfyllingar séu barnheldar. Enn fremur er gert ráð fyrir að bannað verði að auglýsa rafrettur og áfyllingar og að fjölmiðlanefnd hafi eftirlit með því.

Að auki eru lögð til ákvæði um hámarksstyrkleika, stærð áfyllinga, innihaldsefni í áfyllingar sem og hámarksstærð tanka einnota rafrettna og hylkja. Með samþykkt frumvarpsins yrði tilskipun Evrópuþingsins og ráðsins, um samræmingu ákvæða í lögum og stjórnsýslufyrirmælum aðildarríkjanna varðandi fram­leiðslu, kynningu og sölu á tóbaki og tengdum vörum, að hluta til innleidd í íslensk lög.