Tveir fagfjárfestasjóðir í eigu GAMMA standa mun verr en ráð var fyrir gert. GAMMA:Novus sjóðurinn var metinn á 4.4 milljarða króna samkvæmt ársuppgjöri 2018, en við nýlegt endurmat er eigið fé aðeins 42 milljónir og var eigið fé því ofmetið duglega. Kjarninn greinir frá.

Frá þessu er lauslega greint á vef Kviku banka, sem keypti GAMMA í fyrra. Þar er einnig greint frá því að Valdimar Ármann hafi hætt störfum sem forstjóri GAMMA og Máni Atlason verið ráðinn sem framkvæmdastjóri.

Hrunið er útskýrt með þeim hætti að raunveruleg framvinda tiltekinna verkefna hafi verið ofmetinn og að uppfærsla kostnaðaráætlana hafi leitt í ljós að byggingarkostnaður reyndist vanmetinn, sem og að horfur um raunhækkun fasteignaverðs hafi lækkað. Verkefni félagsins er þó enn sögð hagkvæm, en helsta eign Novus sjóðsins er Upphaf fasteignafélag slhf. Sem stendur að byggingu hundruða íbúða á höfuðborgrsvæðinu.

Kvika banki keypti GAMMA síðastliðið vor og sendi frá sér tilkynningu til Kauphallar Íslands í dag þar sem greint var frá því að tveir sjóðir í eigu félagsins væru verr staddir en ráð var fyrir gert og skráð gengi þeirra lækkað sem því næmi, þó ekki komi fram hversu mikil lækkunin væri.

Einnig segir að niðurfærslan muni ekki hafa mikil áhrif á afkomu Kviku.