Brynjar Níelsson, þingmaður Sjálfstæðisflokksins, tjáir sig um kosninguna í embætti ritara Sjálfstæðisflokksins sem fram fer á morgun. Þar er rætt um tveggja hesta kapphlaup, milli Jóns Gunnarssonar og Áslaugar Huldu Jónsdóttur, forseta bæjarstjórnar Garðabæjar, en þau Eyþór Arnalds, oddviti Sjálfstæðismanna í Reykjavík og Vala Pálsdóttir, formaður Landsambands Sjálfstæðiskvenna, hafa bæði hætt við framboð.

Brynjar, sem áður hefur sagt að fyrr lægi hann dauður en að taka við ritaraembættinu af Áslaugu Örnu Sigurbjörnsdóttur, nýskipuðum dómsmálaráðherra, stöðu sem Brynjar sjálfur var orðaður við, virðist fullur kaldhæðni í garð ritaraembættisins. Þá virðist sem Brynjar tjái sig um stöðu sína innan Sjálfstæðisflokksins, en hann hefur löngum sóst eftir ráðherrastöðu, en ekki fengið, ekki frekar en Páll Magnússon, sem hefur lýst yfir óánægju sinni með stöðu mála:

„Nú á að kjósa nýjan ritara Sjálfstæðisflokksins um helgina, sem er mikilvægt og merkilegt djobb. Þar keppa fýldur miðaldra karl og ung kona úr Garðabæ. En það vita ekki allir að til er enn merkilegri staða innan flokksins, sem er “næstum því ráðherra”. Í hana hefur verið sjálfkjörið seinustu ár.“