Davíð Þorláksson, lögfræðingur og fyrrverandi formaður Sambands ungra sjálfstæðismanna, birti í dag pistil á Vísi.is. Í pistlinum talar Davíð um nýnasistasamtökin Norðurvígi sem hafa vakið athygli undanfarnar vikur, en DV hefur fjallað um þau.

„Þeir hafa opnað vef, mætt á fjölfarna staði og gengið í hús til að breiða út boðskap sinn um andúð gegn útlendingum. Þessir hópar hafa ekki verið áberandi hér á landi hingað til en það er áhyggjuefni ef þeir ná sömu fótfestu hér,“

Davíð segir mikilvægt að gera greinarmun á milli skoðana og fordóma, en hann segir að ekki þurfi að bera sömu virðingu á þessu tvennu.

„Það er mikilvægt að gera greinarmun á skoðunum og fordómum. Fordómar eru ekki skoðanir heldur lífssýn sem fólk þróar með sér til dæmis vegna vanþekkingar, ótta við hið óþekkta eða óánægju með hlutskipti sitt í lífinu. Það er því í sjálfu sér engin þörf á því að sýna fordómum sömu virðingu og fólki sem hefur bara aðrar skoðanir en maður sjálfur og fordómar þurfa því ekki endilega að njóta jafn ríkrar verndar á grundvelli skoðanafrelsis.“

Í pistlinum talar Davíð um að til þess að breyta skoðunum þessa fólks sé best að hlusta á og ræða við það á jafningjagrundvelli, í stað þess að  fordæma það á netinu.

„Sumir hafa keppst við að fordæma þetta fólk á samfélagsmiðlum með upphrópunum. Það er auðvitað alltaf freistandi að koma því á framfæri að maður sé betri en einhverjir aðrir. Ég efast hins vegar um að það sé mjög líklegt til árangurs. Fólk er ekki líklegt til að skipta um skoðun eða sýn á lífið við það að vera uppnefnt eða að öskrað sé á það.“

„Eins erfitt og það kann að vera þá er nauðsynlegt að hlusta á þetta fólk og ræða við það af yfirvegun og á jafningjagrundvelli. Fræðsla og aukin þekking á öðrum menningarheimum er lykillinn að því að berjast gegn fordómum.“

Umræður hafa skapast um skoðun Davíðs fyrir neðan deilingu hans á pistil sínum á Twitter. Ekki virðast allir sammála Davíð.

Davíð er sérstaklega gagnrýndur fyrir að kalla meðlimi Norðurvígis þjóðernisfélagshyggjumenn en ekki nasista.

Afhverju að nota villandi og bókstaflega beinþýðingu í staðin fyrir að segja bara hið auðskiljanlega, lýsandi – og það sem skiptir mestu máli _rétta_ orð: Nasistar?

— Sveinn Þórhallsson (@TheAngryVolcano) September 11, 2019

Væri ekki einföld byrjun að kalla þá sínu rétta nafni? Þetta eru einfaldlega nasistar.

— Siggeir F. Ævarsson (@siggeirslayer) September 11, 2019

Davíð svarar því og segir að betra sé að kalla fólk það sem að vilji vera kallað.

Best að kalla fólk það sem það vill láta kalla sig, þ.e.a.s. ef þú vilt að það hlusti á þig.

— Davíð Þorláksson (@davidthorlaks) September 11, 2019

Halldór Auðar Sveinsson, fyrrverandi borgarfulltrúi Pírata segir að umburðarlyndi eigi ekkert endilega við þegar að samtök séu farin að styðja hryðjuverk. Þar á hann við um samstarf Norðurvígis við talsvert alræmdari skandinavísk nasistasamtök, The Nordic Resistance Movement.

Ég er ekki alveg viss um að umburðarlyndi eigi við þegar fólk er beinlínis farið að skipuleggja sig í samtökum sem styðja hryðjuverk leynt og ljóst. Það fólk er ekki að því til að taka einhverja umræðu. Að taka samtalið á betur við um fólk sem hefur ekki stigið slík skref.

— Halldór Auðar Svansson (@tharfagreinir) September 11, 2019

Davíð segist vera að lýsa viðurkenndri aðferð sem mannréttindasamtök hafi notað með góðum árangri.

Það sem ég er að lýsa er viðurkennd aðferð sem mannréttindasamtök í Bandaríkjunum hafa notað með árangursríkum hætti til að takast á við kynþáttahyggju.

— Davíð Þorláksson (@davidthorlaks) September 11, 2019

Halldór svarar Davíð og segir að hugsa þurfi vel hvaða aðferðum sé best að beyta.

Fagna samtalinu, er sjálfur óviss um réttar aðferðir en þetta þarf klárlega að ræða af mjög mikilli yfirvegun og lausnamiðað.

— Halldór Auðar Svansson (@tharfagreinir) September 11, 2019