Í morgun hóf ný deilihjólaleiga starfsemi í Reykjavík og var henni hleypt af stokkunum við eina af rúmlega 40 stöðvum sem notendur geta sótt eða skilað hjólum, samkvæmt tilkynningu frá Reykjavíkurborg.
Hundrað reiðhjól verða til reiðu fyrst í stað og fengu borgarstjóri, forseti borgarstjórnar, formaður skipulags- og samgönguráðs og formaður umhverfis- og heilbrigðisráðs að prófa fyrstu hjólin.
Deilihjólaleigan er rekin undir merkjum Donkey Republic sem býður hjól í mörgum borgum og geta notendur pantað hjól með appi í síma. Hægt verður með appi að sjá laus hjól, en deilihjólaleigan verður notendum að kostnaðarlausu fyrstu vikuna.
Kerfið á Íslandi er rekið af fyrirtækinu Framúrskarandi ehf. samkvæmt tveggja ára þjónustusamningi við borgina upp á fimm milljónir króna. Tvö tilboð bárust borginni um verkefnið, annað frá City Bikes, sem keypti 100 hjól frá þrotabúi WOW í sumar og annarsvegar frá Donkey Republic:
„Það var útboð með skilgreindum forsendum, við unnum útboðið þar sem við vorum með fleiri stöðvar, betra rekstrarmódel og fleiri þjónuststöðvar,“
sagði Eyþór Máni Steinarsson, verkefnastjóri hjá Donkey Republic, við Eyjuna.
„Við trúum því að hjólreiðar og aðrar örflæðilausnir séu framtíð almenningssamgangna. Hjólreiðar munu minnka umferðaröngþveiti, eru umhverfisvænni og gera manni kleift að stunda líkamsrækt á meðan maður ferðast,“
segir Eyþór Máni.
