Í skoðun er að flytja Boeing 737- MAX vélarnar sem kyrrsettar eru í Keflavík, úr landi. Að sögn Boga Nils Bogasonar, forstjóra Icelandair, er Ísland óheppilegur geymslustaður vegna veðurs, en ekki stendur til að nota þær fyrr en eftir áramót. Fréttablaðið greinir frá.

Ef til þessa kæmi að flytja vélarnar, þarf leyfi frá flugmálayfirvöldum. Ekki liggur fyrir hvert vélarnar yrðu fluttar, en ljóst er að þær þyrftu að fara á veðursælli stað:

„Þetta er í skoðun og er búið að vera á teikniborðinu í talsverðan tíma. Það hefur ekkert verið að gerast í ferlinu í heild sinni sem hefur einhver áhrif á þetta. Ákvörðun um þetta mun væntanlega liggja fyrir fljótlega,“

segir Bogi við Fréttablaðið.

Vélarnar voru kyrrsettar í mars og blasa við hverjum þeim sem keyra framhjá Ásbrú. Hefur kyrrsetningin reynst Icelandair illa, en samkvæmt uppgjöri annars ársfjórðungs nam tapið um 19 milljörðum króna, miðað við að þær verði teknar í notkun í nóvember.

Nú er ljóst að svo verður ekki og mun tapið því aukast enn frekar.