„Ég skora á viðskiptabankana þrjá að „drullast“ til að skila þessari vaxtalækkun til neytenda og það strax,“ segir Vilhjálmur Birgisson, formaður Verkalýðsfélags Akraness og 1. varaforseti ASÍ.
Vilhjálmur deilir frétt Vísis í morgun þess efnis að Jyske Bank í Danmörku bjóði viðskiptavinum sínum nú húsnæðislán með -0,5 prósenta vöxtum. Þetta þýðir að í hverjum mánuði munu lán lántakenda lækka umfram það sem þeir borga.
Við Íslendingar búum ekki svo vel að bjóðast viðlíka kjör á húsnæðislánunum okkar, þvert á móti.
„Já, það hefur verið lengi vitað að við Íslendingar höfum verið vaxta- og verðtryggingarpínd og það um allanga hríð,“ segir Vilhjálmur sem nefnir þó að það sé algörlega ólíðandi að viðskiptabankarnir þrír skuli ekki skila stýrivaxtalækkun Seðlabankans til neytenda.
„Eins og flestir vita þá er Seðlabankinn búinn að lækka stýrivextina um 0,75% frá því að lífkjarasamningarnir voru undirritaðir. Á sama tíma og þessi stýrivaxtalækkun um 0,75% hefur átt sér stað hafa viðskiptabankarnir einungis lækkað verðtryggðavexti um ca 0,25% sem er eins og áður sagði óþolandi,“ segir Vilhjálmur sem lengi hefur talað gegn verðtryggingu og háum vöxtum hér á landi.
„Mitt mat er að það er ekki hægt að bjóða íslenskum neytendum uppá þessu vitleysu lengur þ.e.a.s. greiða 3,25% vexti og takið eftir verðtryggingu ofan á það og það á sama tíma og verið er að bjóða dönskum neytendum húsnæðislán á neikvæðum vöxtum eða fasta til 30 ára á 0,5% óverðtryggt. Ég skora á viðskiptabankana þrjá að „drullast“ til að skila þessari vaxtalækkun til neytenda og það strax!“