Gunnar Bragi Sveinsson, þingmaður Miðflokksins, segir að RÚV hafi flutt 70 fréttir af honum í tengslum við Klausturmálið en aðeins 18 fréttir af áreitnimáli Ágústs Ólafs Einarssonar, þingmanns Samfylkingarinnar. Kom þetta fram í útvarpsþættinum Sprengisandur í dag þar sem Gunnar Bragi var í viðtali. Bára Hulda Beck, blaðamaður á Kjarnanum, sakaði Ágúst Ólaf um áreitni og ógnandi framkomu sem hafi átt sér stað sumarið 2018. Ágúst Ólafur baðst opinberlega afsökunar á framkomu sinni í desember og fór í leyfi frá Alþingi. Hann fór síðan í áfengismeðferð en kom aftur til starfa snemma í vor.
Stjórnandi þáttarins benti Gunnari Braga á að tónninn í Klaustur bar mönnum væri miklu harðari núna en fyrst eftir að upptökurnar voru birtar. Þá hefðu menn verið auðmýkri og beðist afsökunar. Gunnar Bragi sagði að afsökunarbeiðnirnar væru enn í fullu gildi:
„Það getur verið að línan sé aðeins harðari en engu að síður gilda enn þær afsökunarbeiðnir sem ég hafði uppi strax eftir að þetta kom upp allt saman, vegna þess að hvað sem líður þessi ferli öllu saman og pólitíkinni þá á maður að reyna að tala ekki með þeim hætti sem þarna var gert og það fólk sem ég bað afsökunar, það gildir að sjálfsögðu áfram,“ sagði Gunnar Bragi.
Gunnar Bragi heldur því fram að margt sem hann sagði þetta kvöld á Klaustur bar hefði verið slitið úr samhengi í fjölmiðlum. Þá telur hann ferli siðanefndar Alþingis galið því ekki sé hægt að láta þingmenn dæma pólitíska andstæðinga eins og gert hafi verið í þessu máli.
Gunnar Bragi lýsti því enn fremur yfir að hann teldi hljóðritun Báru Halldórsdóttur á samræðum sex menninganna þetta kvöld hafa verið skipulagðan verknað.
Nánar er fjallað um málið á Vísir.is