Eyjan greindi frá því í síðustu viku að ólíklegt væri að eyjan Vigur í Ísafjarðadjúpi yrði keypt af Grikkja nokkrum sem hafði lagt fram tilboð í eyna, sem hefur verið til sölu fyrir um 320 milljónir síðan í fyrra.

Sjá nánar: Kaup útlendings á Vigur í uppnámi ? – Kaupandinn ekki Jim Ratcliffe

Greint er frá því á vef bb.is í dag að hann hafi dregið tilboð sitt til baka, en Davíð Ólafsson, fasteignasali hjá Borg í Reykjavík, segir að viðkomandi sé þó ekki endilega hættur við kaupin, heldur hafi reglur um sóttkví fyrir hunda truflað hann.

Þrír aðilar eru áhugasamir um kaupin á Perlunni í Djúpinu, og kanna möguleika á fjármögnun, en Davíð segir að áhuginn hafi magnast eftir umfjöllun í fjölmiðlum. Hinsvegar hafi áhugi landsmanna á að selja jarðir sínar einnig aukist.

Haft er eftir Davíð að útlendingar setji einnig fyrir sig strangar reglur um þyrluflug, því það sé ferðamáti sem þeir kjósi gjarnan:

„Í friðlandinu norðan Djúps má þyrla ekki snerta jörð og Vigur er friðlýst á ákveðnum tíma árs. Þessir erlendu aðilar vilja geta notað þennan ferðamáta.“

Bæjarráð Ísafjarðarbæjar bíður enn eftir viðbrögðum ríkisstjórnarinnar varðandi vilja sinn og áskorun um að ríkið kaupi Vigur, en sú afstaða var ítrekuð á fundi ráðsins í gær.