Nú stendur yfir umræða um ný lög um fiskeldi á Alþingi. Alþjóðlegi útivistarvöruframleiðandinn Patagonia, Landvernd, Náttúruverndarsamtök Íslands ásamt fjölda íslenskra veitingastaða og fyrirtækja hafa lýst yfir stuðningi við átaksverkefnið Á móti straumnum sem er ætlað að vernda íslenska náttúru fyrir laxeldi í opnum sjókvíum. Allir þeir sem styðja átakið vilja vernda líffræðilegan fjölbreytileika, náttúru og orðspor Íslands sem hingað til hefur verið þekkt sem óspilltur áfangastaður, samkvæmt tilkynningu.

Markmið átaksins er þríþætt;

1. Að stækkun iðnaðarins verði stöðvuð þangað til frekari rannsóknir hafa verið gerðar á þeim áhrifum sem hann hefur á náttúruna.
2. Að eftirlit stjórnvalda með iðnaðinum verði aukið og stutt fjárhagslega. Eftirlitið snýr að slysasleppingum, laxalús, erfðablöndun, notkun á lyfjum og eiturefnum.
3. Að stjórnvöld beini iðnaðinum í umhverfisvænni átt með því að veita fyrirtækjum sem stunda eldi í lokuðum kvíum og á landi efnahagslega hvata til uppbyggingar á Íslandi.

Það er NASF á Íslandi, Verndarsjóður villtra laxa, sem stendur að átakinu. NASF á Íslandi eru náttúruverndarsamtök sem hafa vernd Norður-Atlantshafslaxins að meginmarkmiði. Áður höfðu samtökin safnað yfir 10.000 undirskriftum einstaklinga þar sem skorað er á stjórnvöld að stíga varlega til jarðar í leyfisveitingum til frekari uppbygging fiskeldis í opnum sjókvíum. Undirskriftirnar hafa þegar verið afhentar sjávarútvegsráðherra og umhverfisráðherra.

Ryan Gellert, framkvæmdastjóri Patagonia fyrir Evrópu, Miðausturlönd og Afríku, segir af þessu tilefni:

„Patagonia hefur gengið til liðs við íslensk umhverfissamtök og fyrirtæki til að tryggja að raddir þeirra fái að heyrast áður en Alþingi kýs um það fiskeldisfrumvarp sem nú liggur fyrir þinginu. Alþjóðlegir aðilar þekkja vel þau neikvæðu áhrif sem fiskeldi íopnum sjókvíum hefur á lífríki sjávar og við lýsum yfir töluverðum áhyggjum af framtíð villtra fiskistofna verði frumvarpið samþykkt.“

Auður Magnúsdóttir, framkvæmdastjóri Landverndar:

„Ísland hefur mikla hagsmuni af því ýta frekar undir náttúruvernd og hreinleika íslenskrar náttúru. Við eigum að læra af slæmri reynslu nágrannaríkja okkar af fiskeldi í opnum sjókvíum og gæta þess að stefna ekki nátttúru Íslands í voða, sérstaklega þegar fyrir liggja betri og umhverfisvænni aðferðir til að stunda fiskeldi.“

Nuno Servo, veitingamaður og eigandi Sushi Social og fleiri veitingastaða:

„Íslenskir veitingastaðir vilja bjóða viðskiptavinum sínum upp á hágæðavöru og viðskiptavinir gera kröfu um að matvæli séu framleidd með umhverfisvænum og sjálfbærum hætti. Eldislax í opnum sjókvíum uppfyllir hvorki væntingar veitingahúsa néviðskiptavina þeirra.“

Vefsíða átaksins; https://amotistraumnum.is/