Kolbrún Baldursdóttir, oddviti Flokks fólksins í Reykjavík, lagði til á fundi borgarráðs í gær að settar yrðu hjólreiðareglur um hámarkshraða. Í bókun hennar kemur fram að með hækkandi sól aukist umferð hjólandi, gangandi og hlaupandi og fjölmörg dæmi séu um að hjólreiðarmenn fari sér of geyst:
„Fjölmörg dæmi eru um að hjólreiðamenn hjóla allt of hratt þegar þeir fara fram úr öðrum hjólreiðarmönnum og gangandi vegfarendum. Margir hjólreiðarmenn eru t.d. með hundinn sinn sér við hlið. Dæmi eru um að hjólreiðamenn hafi þotið fram hjá á ca 60 km+. Hvað gerist t.d. ef 80 kg hjólreiðamaður lendir á fólki eða dýrum á 60 km hraða? Ástandið er þannig víða að það er ekki spurning um hvort það verður slys heldur hvenær,“
segir Kolbrún í bókun sinni.
Hún nefnir sérstaklega staði eins og í kringum Klapparberg og Víðidal, þar sem mjög blint sé að sunnanverðu vegna trjágróðurs:
„Engu að síður hjóla sumir á ógnarhraða og tekur hiklaust fram úr öðrum á ógnarhraða. Ástandið í Víðidal er alvarlegt hvað þetta varðar. Hér verður að grípa til aðgerða með hraðahindrunum, hámarkshraða og að aðskilja keppnishjólreiðar og gangandi vegfarendur.“
Hjólreiðarmenn þurfa að fara eftir almennum umferðarreglum, bæði á umferðargötum sem og á hjólreiðarstígum. Vandinn er að hjólreiðarstígar á Íslandi eru einnig fyrir gangandi vegfarendur og því getur skapast sú hætta sem Kolbrún nefnir, þó svo hjólreiðamenn sem Eyjan talaði við nefni að fátítt sé að ná allt að 60 kílómetra hraða á göngustígum.
Hinsvegar megi vel skoða að aðskilja keppnishjólreiðar, en þá þurfi að setja fjármagn í slíkar lausnir.
