Fréttablaðið skýrir frá þessu í dag. Þar segir að líklegast sé talið að Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, Áslaug Arna Sigurbjörnsdóttir, formaður utanríkismálanefndar Alþingis, Haraldur Benediktsson, oddviti í Norðvesturkjördæmi, og Bjarni Benediktsson, fjármálaráðherra og formaður flokksins, taki við embættinu.
Þórdís er sögð líklegust til að taka við dómsmálunum og muni Bjarni þá setja annan ráðherra í iðnaðar- og nýsköpunarráðuneytið. Þar komi Haraldur Benediktsson sterklega til greina.
Blaðið segist einnig hafa heimildir fyrir að rætt hafi verið um að Þórdís víki ekki úr núverandi ráðuneyti og að aðrir ráðherrar muni létta undir með henni og sjá um ákveðna málaflokka.
Ekki er talið útilokað að Bjarni taki sjálfur við dómsmálunum á meðan rykið sest og málin skýrast varðandi nýfallinn dóm Mannréttindadómstólsins. Hann hefur þó væntanlega nóg á sinni könnu í fjármálaráðuneytinu.
