Gunnar Bragi Sveinsson, þingmaður Miðflokksins, segir að orðaskipti sín og Lilju Alfreðsdóttur menntamálaráðherra aðeins vera á milli þeirra tveggja. Lilja segir að skilaboðin hefðu verið að hún væri ekki sátt við framkomu Gunnars er hann ræddi um hana á Klaustri.
„Eins og ég hef sagt þá er ég ekki sátt við þessa framkomu og það voru mín skilaboð. […] Það er bara mikilvægt að störf þingsins haldi áfram,“
segir Lilja í samtali við RÚV.
Sjá einnig: Hverju hvíslaði Lilja að Gunnari Braga?
Gunnar Bragi sneri aftur á þing í dag í kjölfar Klaustursmálsins, Lilja sagði í samtali við RÚV að það hefði komið sér að óvart þar sem hún hefði ekki vitað af endurkomu Gunnars Braga og Bergþórs Ólasonar. Vísir greinir frá því að formenn þingflokkanna hafi átt hálftíma fund vegna endurkomu þeirra.
Gunnar Bragi segir í samtali við Mbl að hann sitji á þingi fyrir þá sem hafi kosið hann þangað, ekki aðra. „Margir hafa tekið vel á móti okkur en eðlilega eru ekkert allir ánægðir með að fá okkur til baka. En við erum ekki á þingi fyrir þetta fólk. Við erum þar vegna þeirra sem kusu okkur á þing. Við erum á þingi til þess að vinna fyrir þá og það ætlum við að gera,“ segir Gunnar Bragi.
Eyjan hefur ekki náð tali af Lilju eða Gunnari Braga. Þingmenn sem eiga sæti nálægt Gunnari Braga vilja ekki tjá sig um orðaskiptin.
