Ungir Píratar í uppreisnarhug ætla að halda skemmtun á morgun, föstudaginn langa – að manni sýnist í því skyni að storka reglum um helgidagafrið. Þeir virðast meira að segja telja að það sem þeir eru að gera sé stranglega bannað.

En Píratarnir eru búnir að missa af þessum vagni. Kapítalisminn er löngu lagður af stað á þessari leið.

Veitingahús og búðir hafa opið út um allan bæ. Maður þarf ekki að leita lengi á vefnum til að sjá að Melabúðin er opin, nokkrar verslur Krónunnar, Víðir, og sumar búðir 10/11.

Það eru sýningar í bíó allan daginn og ætli sé nokkuð mál að drekka sig fullan á einhverri af fjölmörgum krám sem verða opnar?

Ekkert af þessu er opið vegna þeirrar hugsjónar að rjúfa helgidagafrið, heldur er það einungis löngunin til að græða sem ræður ferðinni.