Jón Steindór Valdimarsson, þingmaður Viðreisnar, fer hörðum orðum um ummæli sem Anna Kolbrún Árnadóttir, þingmaður Miðflokksins og einn sexmenninganna á leyniupptökunni frá Klaustri Bar, lét falla á Bylgjunni í morgun um starfsmenn Alþingis.

Vildi Anna Kolbrún meina að hið ósmekklega, klúra og á köflum hatursfulla tal sem átti sér stað á barnum þriðjudagskvöldið 20. nóvember væri hluti af kúltur sem hefði skapast á Alþingi og væri ekki bundinn við Alþingismenn eina heldur annað starfsfólk líka.

Jón Steindór telur að hér sé ómaklega vegið að starfsfólki Alþingis og skrifaði þennan stutta pistil um málið á Facebook-síðu sinni í kvöld:

 „Ósmekkleg ummæli um starfsmenn Alþingis.

Anna Kolbrún Árnadóttir, alþingismaður, var í viðtali í útvarpsþættinum Í Bítið á Bylgjunni í morgun.

Þar fór hún meðal annars orðum um Alþingi og starfsmenn þess sem fólu í sér afar ósmekklega aðdróttun um að starfsmenn Alþingis væru með einhverjum hætti hluti af einhverjum kúltúr sem umræðan á Klaustri væri sprottin af.

Hún sagði m.a:

„Við höfum kannski stundum haldið að þetta sé fólkið að þetta séu alþingsmenn sem skapa þennan kúltúr en ég er svolítið farin að efast um að það séu bara alþingsmenn.“

og síðar:

„Ég er að tala um stofnunina Alþingi vegna þess að starfsmennirnir, það eru allir mannlegir, þeir fara líka inn í þennan kúltúr þegar þeir fara þarna. … Það er samt eitthvað þarna sem er óáþreifanlegt.“

Ég held að varla finnist betri hópur af samviskusömu, kláru og hjálpsömu fólki sem gætir þess í hvívetna að vega hvorki að virðingu þings né þingmanna.“