Viðar Freyr Guðmundsson hefur sagt af sér sem formaður Miðflokksfélags Reykjavíkur og er hættur öllum störfum fyrir flokkinn. Í bréfi sem hann sendi stjórn flokksins og birtir á Facebook segir hann ástæðuna vera langvarandi óánægju með skipulagsleysi innan flokksins og skort á lýðræðislegum ferlum sem hafi kristallast í eftirmálum Klaustursmálsins.
Fyrir þá sem ekki muna snerist Klaustursmálið um upptökur af fjórum þingmönnum flokksins, þar á meðal formanninum, að ræða um vilyrði fyrir sendiherrastöðum, menntamálaráðherra var sögð nota karlmenn og ýmsar stjórnmálakonur voru kallaðar „kuntur“ ásamt fleiru. Tveir þingmenn flokksins eru í leyfi vegna málsins.
Hér má lesa bréf Viðars Freys í heild sinni:
„Kæru félagar í Miðflokknum!
Ég hef ákveðið að segja mig frá störfum með Miðflokknum eftir mikið hugarstríð. Konfekt og laufabrauð hjálpuðu mér að komast að þessari niðurstöðu. Ástæður þessa eru langvarandi óánægja með skipulagsleysi við stjórn flokksins og málefnastarf. Sem hefur kristallast t.d. í eftirmálum við Klaustursmálið og hvernig tekið var á þeim. Það vantar skýrari ábyrgðarkeðjur og lýðræðislegri ferla í starfið til að hægt sé að taka á erfiðum málum sem kunna að koma upp og eins til að reka hefðbundið lýðræðislegt flokkastarf.
Ég hef tekið þátt í eða fylgst með hvernig ýmsir flokkar haga starfi sínu og því miður finnst mér vanta töluvert upp á að Miðflokkurinn sé á pari við suma aðra flokka þegar kemur að skipulagningu á málefnastarfi flokksins sem heild. Það var svo sem hægt að horfa fram hjá þessu til að byrja með þar sem flokkurinn var nýr og varla sanngjarnt að bera saman við flokka sem hafa starfað í nærri 100 ár. En ég sé ekki neina bót á þessu á sjóndeildarhringnum. Þannig að ég tel að minni orku sé betur varið að starfa utan flokka að sinni.
En ég þakka fyrir allar góðu stundirnar og óska öllum ykkar alls hins besta. Vona auðvitað að Miðflokkurinn nái sér á strik. Jarðvegurinn fyrir þessum flokki er til staðar. Þykir leiðinlegt að þurfa að skilja við ykkur með þessum hætti. En ég held að í fyllingu tímans munum við öll sjá að það er fyrir bestu. Sérstakar þakkir vil ég senda til félaga minna í Miðflokksfélagi Reykjavíkur og borgarfulltrúum okkar, sem öll hafa unnið frábært og óeigingjarnt starf. Ég mun eflaust halda áfram að styðja þau með ýmsum hætti þar sem við eigum málefnalega samleið, beint eða óbeint.
Gleði og ný tækifæri á nýju ári,
Viðar Freyr Guðmundsson.“