Talið er að um 600 tonn af flugeldum verði sprengd í loft upp um áramótin, með tilheyrandi loftmengun. Mörgum er enn í fersku minni mengunin á áramótunum í fyrra, sem varð til þess að einhverjir kölluðu eftir því að banna, eða draga úr, flugeldanotkun. Var sett Evrópumet í mengun í Kópavogi, þar sem sólarhringsmeðaltal svifryks mældist 394 míkrógrömm á rúmmetra, en viðmið Evrópusambandsins er 50 míkrógrömm á sólarhring.

Gunnar Guðmundsson, lungnalæknir og prófessor við Háskóla Íslands, biður almenning um að sýna lungnasjúklingum skilning um áramótin í grein sinni í Morgunblaðinu í dag en hann óttast að svifryk geti orðið með mesta móti:

„Ég vona að ís­lensk þjóð sýni lungna­sjúk­ling­um skiln­ing varðandi flug­elda­meng­un um ára­mót og gæti hófs. All­ir eiga sama rétt á að vera á ferðinni um ára­mót­in,“

Segir Gunnar og gefur þeim sem viðkvæmir eru fyrir svifryki eftirfarandi ráð:

1. Halda sig inn­an­dyra á ára­mót­um og dag­ana þar í kring og hafa glugga lokaða. Hægt er að þétta glugga og hurðir með rök­um hand­klæðum

2. Eiga næg­ar birgðir af lungna­lyfj­um og kanna í tíma að end­ur­nýja þau fyr­ir ára­mót­in.
3. Ef vart verður mik­illa ein­kenna ætti að grípa til stutt­virkra berkju­víkk­andi lyfja eins og Ventol­in eða Bricanyl og nota nokkr­um sinn­um á dag ef að á þarf að halda. Aðra lyfjameðferð við önd­un­ar­færa­sjúk­dóm­um gæti hugs­an­lega þurft að auka tíma­bundið í sam­ráði við lækni.
4. Ef óþæg­ind­in eru mjög mik­il er opið á bráðadeild Land­spít­al­ans all­an sól­ar­hring­inn og all­ir vel­komn­ir þangað að fá aðstoð ef á þarf að halda.“

Samkvæmt veðurspánni verður frost og heiðskýrt og 4 metrar á sekúndu á miðnætti á Gamlársdag, sem er líklega nóg til þess að blása menguninni burt, en veðurfræðingum ber þó ekki saman um það.