Í gærkvöldi var haldin árleg þingveisla á Bessastöðum í tilefni af fullveldisdeginum. Þangað mættu flestir þingmenn sem áttu heimangengt, en öllum er boðið venju samkvæmt. Var veislan sveipuð skugga Klaustursupptakanna sem átti fyrirsagnir gærdagsins.
Forseti Íslands, Guðni Th. Jóhannesson, kom inn á í ræðu sinni að þetta hefði verið „erfiður dagur“ fyrir þingið, en hann þótti komast vel að orði um þetta annars erfiða mál.
Samkvæmt heimildum Eyjunnar mun Steingrímur J. Sigfússon, forseti Alþingis, hafa komið þeim vinsamlegu ábendingum áleiðis til Gunnars Braga Sveinssonar og Bergþórs Ólasonar, Miðflokki, að nærveru þeirra væri ekki óskað á Bessastöðum vegna framgöngu þeirra á Klaustur bar í garð kollega sinna.
Virtu tvímenningarnir óskina og mættu ekki í fagnaðinn.
Þangað mættu hinsvegar Sigmundur Davíð Gunnlaugsson og Anna Kolbrún Árnadóttir, Miðflokki, og Ólafur Ísleifsson og Karl Gauti Hjaltason, Flokki fólksins, sem leika misstór hlutverk í upptökunum. Ekki voru allir jafnánægðir með mætingu þeirra, sem er sagt hafa sést á sætavalinu, sem var blessunarlega frjálst. Mun ónefndur þingmaður Flokks fólksins til dæmis ekki hafa yrt á kollega sína allt kvöldið.
Á fundi Flokks fólksins í gær var skorað á þá Ólaf og Karl Gauta um að segja af sér. Eftir fundinn sögðu þeir við Eyjuna að það ætluðu þeir ekki að gera og fóru í kjölfarið á Bessastaði.
