Nató, Bandaríkin og vestrænt varnarsamstarf eru mjög áberandi á Íslandi þessa dagana. Nú um helgina hefur varla verið þverfótað fyrir bandarískum sjóliðum í Reykjavík. Þeir eru af stórum herskipum sem liggja inni í Sundahöfn – fjöldi fólks hefur lagt leið sína þangað til að skoða skipin.
Og hér hafa verið heræfingar sem sagt hefur verið frá í fréttum.
Seinna í vikunni verður svo haldin ráðstefna á vegum Nató hér í Reykjavík. Það er dálítið kaldhæðnislegt að umfjöllun ráðstefnunnar eru gereyðingarvopn. Í fréttum í sumar kom fram að Katrín Jakobsdóttir hefði í tengslum við hana boðið til Íslands fulltrúm Ican, en það eru alþjóðasamtök um eyðingu kjarnorkuvopna.
En nú, fáum dögum fyrir upphaf ráðstefnunnar, berast þær fréttir frá Bandaríkjunum að Trump forseti ætli að rifta samkomulagi um útrýmingu meðaldrægra kjarnorkuvopna sem byggir á því sem Reagan og Gorbatsjov ræddu á fundinum í Reykjavík 1986.
Það verður semsagt nóg að ræða umræddum Nató-fundi hér í bænum. Og reyndar spurning hvort svona samkomu sé ekki algjörlega hleypt upp með slíkum fyrirætlunum um að magna upp vígbúnaðarkapphlaup. Það er yfirlýst markmið Nató að hindra útbreiðslu gereyðingarvopna.
Um afstöðu Vinstri grænna, sem veita ríkisstjórn Íslands forystu, þarf varla að spyrja.