Kristján Loftsson og Ásdís Halla Bragadóttur hlutu Frelsisverðlaun Sambands ungra sjálfstæðismanna (SUS) við hátíðlega athöfn í Valhöll í kvöld. Ingvar S. Birgisson, formaður SUS, veitti verðlaunin fyrir hönd stjórnarinnar.

Í tilkynningu frá SUS segir:

„Að venju voru verðlaunin veitt einum einstaklingi og einum lögaðila. Báðir verðlaunahafar í ár eiga það sameiginlegt að berjast fyrir auknu atvinnufrelsi.“

Í umsögn segir að Ásdís Halla Bragadóttir hafi hlotið verðlaunin fyrir áralanga baráttu sína fyrir auknu valfrelsi í heilbrigðis- og menntamálum. Rökstyður stjórn SUS valið á þennan hátt:

„Sem bæjarstjóri Garðabæjar studdi hún við sjálfstæðan rekstur skóla í sveitarfélaginu. Hefur það leitt til þess að skólakerfið í Garðabæ er fjölbreyttara, sveigjanlegra og þjónustar nemendur betur en ella. Þá hefur Ásdís verið áberandi í umræðunni á þessu ári um baráttu Kliníkurinnar í Ármúla fyrir sjálfstæðum rekstri í heilbrigðiskerfinu. Slíkur rekstur bætir þjónustu við sjúklinga, styttir biðraðir og nýtir skattfé betur.“

Þá var Hvalur hf. fyrirtæki Kristjáns Loftssonar verðlaunað og tók forstjórinn við verðlaununum. Í umsögn SUS segir:

„Hvalur hf. hlaut verðlaunin fyrir baráttu sína fyrir hvalveiðum á Íslandsmiðum. Hvalveiðar fela í sér mikilvægt atvinnufrelsi en Hvalur hf. hefur í fjölmörg ár barist fyrir því að veiðar á hvölum séu leyfðar, enda er um sjálfbæra nýtingu að ræða sem styðst við vísindaleg gögn.“