Líkt og fjallað hefur verið um, réðst Reykjavíkurborg í endurgerð bragga í Nauthólsvík sem farið hefur 257 milljónir fram úr kostnaðaráætlun. Upphaflegt kostnaðarmat var 158 milljónir, en heildarkostnaður er kominn upp í  415 milljónir.

Í svari frá Reykjavíkurborg við fyrirspurn Eyjunnar um framkvæmdarkostnað, kemur fram að endanlegur kostnaður liggi ekki fyrir á þessum tímapunkti, þar sem framkvæmdum sé ekki lokið.

Háskólinn í Reykjavík hyggst leigja braggann af Reykjavíkurborg og reka þar frumkvöðlasetur, en HR átti einnig fulltrúa í byggingarnefnd braggans og voru hinar kostnaðarsömu breytingar unnar í fullu samráði við háskólann.

Í leigusamningnum er kveðið á um að grunnleiguverð braggans sé 450 þúsund krónur á mánuði, en það taki mið af upphaflegum framkvæmdarkostnaði, sem var 158 milljónir króna.

Í samningnum er einnig ákvæði um að fari framkvæmdarkostnaður fram úr áætlun, þá greiði HR þriðjungshlut þess kostnaðar og reiknist leiguverðið með sama hætti og grunnleigan.

Þar sem framkvæmdarkostnaður er þegar kominn 257 milljónir fram úr áætlun er þriðjungshluti HR um 86 milljónir, eða 244 þúsund á mánuði.

Samtals er því leigan í heildina 694 þúsund krónur á mánuði fyrir afnot af bragganum. Leigan er vísitölutryggð og gildir samningurinn til 10 ára.

Leigutekjur Reykjavíkurborgar af bragganum eru því 8,3 milljónir á ári, en munu hækka í samræmi við við endanlegan framkvæmdarkostnað, sem líkt og áður segir, liggur enn ekki fyrir.