Stúdentaráð Háskóla Íslands gagnrýnir harðlega vinnubrögð Lilju Alfreðsdóttur, mennta- og menningarmálaráðherra, við ferli skipunar í embætti framkvæmdarstjóra Lánasjóðs íslenskra námsmanna (LÍN). Þann 13. júní var framkvæmdastjórinn, Hrafnhildur Ásta Þorvaldsdóttir, endurskipuð til næstu fimm ára án þess að staða hennar væri auglýst opinberlega.

Í ályktun Stúdentaráðs segir að Lilja hafi sagt það vera stefnu sína að auglýsa ætti í stöður sem þessar, en óásættanlegt væri að hún gangi á bak orða sinna:

„Krafa stúdenta um að auglýsa eigi opinberlega í stöður sem þessar er skýr, og á að gilda í hvert skipti sem ráðningartímabili lýkur. LÍS leggja áherslu á að gagnsæi og fagmennska séu höfð að leiðarljósi í starfsemi ráðuneytisins og að vinnubrögð sem þessi endurspegli ekki þau gildi. Undir þetta tekur SHÍ. Stúdentaráði þykir óásættanlegt að mennta- og menningarmálaráðherra fari á bak orða sinna með slíkum hætti en í mars síðastliðnum sagði hún það vera sína stefnu að auglýsa ætti stöður sem þessar opinberlega og að ráðningin ætti að fara fram með gagnsæjum hætti.“

Þá er sagt að hvorki hafi verið gefin rökstuðningur fyrir valinu, né send út tilkynning þess efnis og ákvörðunin hafi ekki verið tilkynnt á stjórnarfundi sjóðsins þann 14. júní. Telja stúdentar að það samræmist ekki gagnsæju ferli við ráðningu og brjóti í bága við vandaða stjórnsýsluhætti.