Hilda Jana Gísladóttir, sjónvarpsstjóri N4 á Akureyri, hefur sagt upp stöðu sinni til að leiða lista Samfylkingarinnar í næstkomandi sveitastjórnarkosningum. Þetta kemur fram á Facebooksíðu hennar.

„Ég hef tekið þá ákvörðun að bjóða fram krafta mína fyrir hönd Samfylkingarinnar í komandi sveitarstjórnarkosningum. Ég hef ávallt haft mikinn áhuga á samfélaginu mínu og þar af leiðandi stjórnmálum, það er einmitt þess vegna sem ég heillaðist upphaflega af því að starfa í fjölmiðlum. Ástæða þess að ég vil taka þetta skref með Samfylkingunni er einfaldlega sú að sá flokkur hefur oftast hugmyndafræðilega verið mér næstur, þá ekki síst mikilvæg áhersla á jöfnuð í samfélaginu okkar. Á starfstíma mínum í fjölmiðlum hef ég lagt áherslu á hlutleysi í flokkapólitíkinni, þó svo að á N4 hafi sem betur fer grímulaus landsbyggðapólitík verið hluti af starfinu. Ég hef verið svo einstaklega heppin að fá að kynnast samfélaginu okkar frá ýmsum hliðum á þeim 18 árum sem ég hef starfað í fjölmiðlum á Akureyri og ég er viss um að sú reynsla og þekking geti nýst vel í bæjarmálunum, fái ég til þess umboð kjósenda. Ævintýralegt ferðalag mitt með N4 er því á enda og vil ég á þessum tímamótum þakka samstarfsfólki og viðmælendum stöðvarinnar fyrir einstaklega eftirminnilegan og lærdómsríkan tíma. Helst af öllu vil ég þó þakka áhorfendum um land allt samfylgdina, ótrúlegan stuðning og jákvæðni í gegnum árin.“

Dagbjört Pálsdóttir bæjarfulltrúi er í öðru sæti, Heimir Haraldsson náms- og starfsráðgjafi er í þriðja sæti. Listinn var samþykktur einróma á aðalfundi Samfylkingarfélagsins á Akureyri í gærkvöld, samkvæmt tilkynningu.