Örnólfur Hall, arkitekt og annar höfundur Íslandsbankahússins á Kirkjusandi, er ósáttur við framferði Dags B. Eggertssonar borgarstjóra varðandi framtíð hússins. Dagur lét teikna hugmyndir um endurgerð hússins í upprunalegri mynd og kynnti þær á íbúafundi í síðustu viku, án þess að hafa samráð við Örnólf eða Ormar Þór Guðmundsson, sem hönnuðu húsið fyrir Samband íslenskra samvinnufélaga árið 1988. Þetta kemur fram í Morgunblaðinu.

Íslandsbanki flutti úr húsinu á síðasta ári, en húsið er mikið skemmt. Örnólfur segir við Morgunblaðið að það séu óvönduð vinnubrögð af hálfu borgarstjóra og arkitektasofunni Kurt og Pí, sem gerði nýju teikningarnar, að hafa hvorki samband við bankann né fyrri hönnuði hússins:

„Þetta lyktar af einhverri pólitík. Okkur finnst þetta svakalegur dónaskapur bæði hjá borgarstjóra og hjá þessum drengjum hjá Kurt og Pí,“

segir Örnólfur, en samkvæmt Eddu Hermannsdóttur, samskiptastjóra Íslandsbanka, er framtíð hússins á Krikjusandi óráðin hvað bankann varðar.

Örnólfur segist hinsvegar hafa fengið þau skilaboð frá bankanum að engin áform séu uppi um að rífa húsið og jafnvel komi til greina að ráðast í viðgerðir á því.