Samkvæmt Hagstofu Íslands mældist atvinnuleysi 2,6% á síðasta ársfjórðungi ársins 2017. Þetta kemur fram á vefsíðu Hagstofunnar:
Á fjórða ársfjórðungi 2017 voru að jafnaði 199.600 manns á aldrinum 16–74 ára á vinnumarkaði. Af þeim voru 194.400 starfandi og 5.200 án vinnu og í atvinnuleit. Atvinnuþátttaka var 81,2%, hlutfall starfandi 79,1% en atvinnuleysi 2,6%. Samanborið við fjórða ársfjórðung 2016 fjölgaði starfandi fólki um 2.700 en hlutfall starfandi af mannfjölda lækkaði um 1,8 prósentustig. Á sama tíma fjölgaði atvinnulausum lítillega, eða um 200 manns og hlutfall atvinnulausra af vinnuafli hækkaði um 0,1 prósentustig. Atvinnulausar konur voru 2.300 og var atvinnuleysi á meðal kvenna 2,5%. Atvinnulausir karlar voru 2.900 eða 2,7%. Atvinnuleysi var 2,5% á höfuðborgarsvæðinu og 2,7% utan þess.
Langtímaatvinnuleysi
Á fjórða ársfjórðungi 2017 höfðu um 600 manns verið atvinnulausir í ár eða lengur. Það jafngildir 10,9% atvinnulausra samanborið við 300 manns á fjórða ársfjórðungi 2016, sem þá voru 7,0% atvinnulausra. Á fjórða ársfjórðungi 2017 voru 0,3% af þeim sem voru á vinnumarkaði langtímaatvinnulausir samanborðið við 0,2% á fjórða ársfjórðungi 2016.
Vinnutími
Á fjórða ársfjórðungi 2017 voru að jafnaði 179.900 manns við vinnu í hverri viku ársfjórðungsins eða 92,5% starfandi fólks og 73,2% af heildarmannfjölda 16–74 ára. Meðalfjöldi heildarvinnustunda á viku voru 38,9 klukkustundir hjá þeim sem voru við vinnu í viðmiðunarvikunni, 44,3 klukkustundir hjá þeim sem voru í fullu starfi og 23,1 klukkustundir hjá þeim sem voru í hlutastarfi.
Vinnumarkaður á 4. ársfjórðungi 2017 – Hagtíðindi
