Smári McCarthy þingmaður Pírata segir marga vera með fordóma gagnvart flokknum. Í viðtali við Smára í helgarblaði DV hafnar hann því alfarið að Píratar séu aðeins stefnulausir stjórnleysingjar sem vilji sitja fyrir framan tölvuna á borgaralaunum. Slík sjónarmið hafa komið fram í skrifum Brynjars Níelssonar þingmanns Sjálfstæðisflokksins og Sirrýar Hallgrímsdóttur.

Þetta er upplifun sem hefur aldrei byggst á neinu öðru en fordómum. Ef fólk kæmi og sæi hvernig við störfum þá gæti það ekki komist að þessari niðurstöðu. Það er rétt að við störfum að sumu leyti allt öðruvísi en aðrir flokkar, annað er mjög hefðbundið. Við erum ekki með formann en það hefur komið til umræðu. Við erum alltaf tilbúin í samtal, ef einhver er með gagnrýni á okkur þá erum við alveg til í að fara yfir það,

segir Smári. Varðandi borgaralaunin þá væru þau sambærileg listamannalaunum. Píratar voru gagnrýndir nokkuð fyrir að útiloka samstarf með öðrum flokkum. Fyrir síðustu kosningar útiloku þeir ríkisstjórnarsamstarf með Sjálfstæðisflokknum og einnig samstarf við Framsóknarflokkinn í kosningunum 2016. Smári segir að það þýði ekki að Píratar vilji ekki vinna með þeim í ákveðnum málum:

„Við treystum okkur ekki til þess að fara í ríkisstjórn með þeim því við höfum séð hvernig það gengur fyrir sig. Munurinn skiptir máli, í starfinu á þinginu er maður að vinna með fólki sem maður er ósammála í sumum efnum, þannig á þetta að virka. En vegna þess að flestir flokkar sem hafa farið í stjórn með Sjálfstæðisflokknum hafa farið laskaðir eða ónýtir út úr því samstarfi, þetta lítur út eins og algjört ofbeldissamband, þá er vont fyrir flokk eins og okkur að ætla að vinna með honum í ríkisstjórn. Það er línan sem við drógum fyrir síðustu kosningar. Það er ekkert til frambúðar, það gæti alveg komið sá tími að við yrðum til í að fara með þeim í ríkisstjórn.“