Ólafur Arnarson hagfræðingur, ætlar ekki að bjóða sig fram til borgarstjórnarkosninga í vor, en hann tilkynnti þetta á Facebooksíðu sinni í morgun. Í gær sagðist hann ætla að hugleiða málið eftir fjölda áskorana, en ákvað að gefa ekki kost á sér.

Í samtali við Eyjuna sagðist Ólafur ekki hafa hræðst framboð Eyþórs Arnalds, hann hafi alltaf búist við verðugum frambjóðendum:

„Nei ég reiknaði alltaf með að það yrði nú einhver sóttur í þetta, ef ekki Eyþór þá einhver annar. Þetta sneri bara að mér og mínu fólki, maður þarf að geta gefið sig allan í þetta og ég er bara ekki í þeirri stöðu að geta það,“

sagði Ólafur.
Vala Pálsdóttir, sem einnig hefur legið undir feldi með framboð, sendi frá sér tilkynningu undir hádegi, að hún hyggðist ekki bjóða sig fram:

„Síðustu dagar hafa verið stórskemmtilegir, eiginlega ótrúlegir. Það hvarflaði ekki að mér að ég ætti svona góðan og víðtækan stuðning í borgarmálin og það úr ólíkum áttum. Það sem meira er, Sjálfstæðisflokkurinn iðar af áhuga og vilja flokksmanna til að bæta borgina okkar. Ég hef hugsað málið mjög vel og hef tekið þá ákvörðun að bjóða mig ekki fram í leiðtogaprófkjörið. Ég er þó mjög þakklát fyrir alla þá hvatningu og stuðning sem ég hef fundið fyrir.

Ég mun halda áfram starfi mínu sem formaður Landssambands sjálfstæðiskvenna, í því mikilvæga hlutverki að hvetja og efla allar þær góðu konur sem starfa fyrir flokkinn um land allt til þátttöku í stjórnmálum.

Áfram Sjálfstæðisflokkurinn! “

Leiðin virðist því nokkuð greið fyrir Eyþór Arnalds, en miðað við þá gagnrýni sem borgarfulltrúar Sjálfstæðisflokksins hafa fengið frá samflokksmönnum sínum hingað til, munu þau Kjartan Magnússon og Áslaug María Friðriksdóttir eiga fullt í fangi með að sigra Eyþór í leiðtogakjöri flokksins þann 27.janúar.