Fyrrum hershöfðingjarnir John Kelly og Jim Mattis gerðu með sér samkomulag um að annar hvor þeirra yrði alltaf á vakt að fylgjast með skipunum Donalds Trump forseta Bandaríkjanna. Þetta hefur fréttaveitan AP eftir nafnlausum heimildarmanni. Munu þeir Kelly, sem er nú skrifstofustjóri Hvíta hússins, og Mattis varnarmálaráðherra, hafa samið um þetta sín á milli skömmu eftir að Trump tók við embætti fyrr á þessu ári.

Er því haldið fram að hershöfðingjarnir fyrrverandi hafi miklar áhyggjur af stefnumálum Trump og mögulegum afleiðingum þeirra, þá helst í tengslum við bann við komu múslima til Bandaríkjanna. Hefur Kelly meðal annars notað stöðu sína innan ríkisstjórnarinnar til að tryggja að þeir sem hafi græna kortið séu undanskildir ferðabanninu og hefur Mattis varið rétt íraskra ríkisborgara innan Bandaríkjanna.

Kelly sýndi vald sitt innan Hvíta hússins þegar hann lét reka Anthony Scaramucci eftir aðeins nokkra daga í starfi sem fjölmiðlafulltrúa. Vonast þingmenn Repúblikana til að áhrif hershöfðingjanna komi röð og reglu á Hvíta húsið á komandi misserum. Sagði öldungadeildarþingmaðurinn Lindsey Graham meðal annars:

Landgönguliðarnir eru komnir á land í Hvíta húsinu. Landgönguliðar geta gert næstum því hvað sem er.