Fjölmiðlar fjalla fimm sinnum meira um hryðjuverk sem múslimar fremja en hryðjuverk sem aðrir fremja. Þetta eru niðurstöður nýrrar bandarískrar rannsóknar um fjölmiðlaumfjöllun þar í landi.

Á tímabilinu 2011 til 2015 sýndu fjölmiðlar hryðjuverkum sem framin voru af múslimum 449% meiri athygli. Við rannsóknina, sem gerð var í Háskólanum í Georgíu, voru talin þau skipti sem fjallað var um tiltekið hryðjuverk og það greint. Á þessu tímabili frömdu múslimar 12,4% af öllum hryðjuverkum en umfjöllun fjölmiðla var 41,4% á þeim hryðjuverkum. Hef breska vefritið Independent eftir rannsakendunum að þetta bendi til fjölmiðlar séu að ýta undir ótta við múslima.

Á þessu tímabili sneru rúm 20% fjölmiðlaumfjöllunar að hryðjuverkunum í Boston árið 2013 þar sem þrír létust, hryðjuverkamennirnir voru múslimar. Var þetta borið saman við umfjöllun um hryðjuverkin í Wisconsin þar sem sex létu lífið, hryðjuverkamaðurinn var hvítur og sneri 3,8% umfjöllunar fjölmiðla á tímabilinu að þeim atburði. Sömu sögu er að segja af voðaverkum Dylan Roof í Suður-Karólínu og Frazier Glenn Miller í Kansas.

Vilja rannsakendur meina að niðurstöðurnar hrekji orð Donalds Trump Bandaríkjaforseta um að lítið sé fjallað um hryðjuverk múslima:

Eftir stendur að árásir sem framdar eru af múslimum fá miklu meiri umfjöllun. Gögnin sýna að múslimar frömdu 12,4% allra árása en fengu 41,4% af umfjölluninni. Hvort þetta sé meðvituð ákvörðun hjá fjölmiðlum eða ekki þá gefur þetta í skyn að fólki beri að óttast tiltekinn hóp frekar en annan. Með því að fjalla svona mikið um hryðjuverk múslima þá er það látið líta út eins og þau séu algengari en önnur. Miðað við niðurstöðurnar þá er ekkert skrýtið að Bandaríkjamenn óttist róttæka íslamista. Sannleikurinn er samt sá að þessi ótti á ekki við rök að styðjast.