Theresa May, leiðtogi Íhaldsflokksins mun fara á fund Elísabetar Bretadrottningar kl. 12:30 að breskum tíma og fara þess á leit við drottninguna að hún veiti henni umboð til stjórnarmyndunar þrátt fyrir að hafa misst meirihlutan í neðri deild þingsins í þingkosningunum sem fram fóru í gær. Jeremy Corbyn, leiðtogi Verkamannaflokksins hefur skorað á May að segja af sér sem forsætisráðherra.

Úrslit kosninganna eru með þeim hætti að enginn flokkur hefur náð hreinum meirihluta. Allt stefnir í að Íhaldsflokkurinn fái 318 sæti og Verkamannaflokkurinn 262. May hefur tilkynnt að hún hafi ekki í hyggju að leggja árar í bát og segja af sér. Íhaldsmenn þyrftu átta þingsæti í viðbót til að ná hreinum meirihluta.

Sjá umfjöllun Eyjunnar: Kosningar í Bretlandi á morgun – Nær enginn hreinum meirihluta?

Orðrómar eru uppi um að Verkamannaflokkurinn, ótvíræður sigurvegari kosninganna, muni freista þess að mynda minnihlutastjórn. Corbyn sigraði í sínu kjördæmi með meira en 40 þúsund atkvæðum og flokkur hans náði fjölmörgum sætum frá Íhaldsflokknum. Fyrrum formaður Frjálslynda flokksins og varaforsætisráðherra, Nick Clegg missti þingsæti sitt til Verkamannaflokksins og náði flokkurinn aftur sætinu sem Gordon Brown, fyrrum formaður og forsætisráðherra hélt í Skotlandi.