Sænsk stjórnvöld ætla nú að gera gangskör að því að leita uppi og vísa úr landi 12 þúsund hælisleitendum sem dvelja þar í landi. Þetta er fólk sem hefur fengið neitun frá stjórnvöldum um hælisvist í Svíþjóð. Fólkið ætti að vera farið úr landi en stjórnvöld ekki náð til þess eftir að hælisumsókn var hafnað.

Karlmaðurinn frá Úsbekistan sem hefur viðurkennt að hafa ekið bílnum sem notaður var í hryðjuverkaárásinni í Stokkhólmi á föstudag var hópi þeirra sem hefur verið neitað um hæli í Svíþjóð. Það gerðist á síðasta ári. Yfirvöld töldu sögu hins 39 ára gamla Rakhmat Akilov um að hann væri ofsóttur af stjórnvöldum í Úsbekistan ekki trúverðuga. Þar með fékk hann ekki stöðu flóttamanns.

Hann hafði fengið fjögurra vikna frest til að yfirgefa landið. Þegar hann gerði það ekki leitaði sænska lögreglan hann uppi en greip í tómt þar sem maðurinn hafði skipt um aðsetur án þess að tilkynna hvert hann hefði flutt. Við það var látið sitja, maðurinn bjó áfram ólöglega í landinu.

Sænsk stjórnvöld telja að um 12 þúsund hælisleitendur sem eru í sömu stöðu séu nú í Svíþjóð. Nú hefur Anders Ygeman innanríkisráðherra lýst því yfir að farið verði í átak til að leita þetta fólk uppi og vísa því úr landi.

Það segir sig sjálft að sá skal snúa til baka sem hefur ekki grundvöll til hælis eða þörf fyrir vernd,

segir hann við Aftenposten. Nú fær lögreglan aukið fjármagn til að fylgja eftir úrskurðum um höfnun á hælisumsóknum og farið verður í að leita að fólki, það handsamað og sent úr landi.