Efnahagur heimsins er í uppsveiflu. Þetta má lesa í leiðara nýjasta heftis The Economist. Leiðarar þessa tímarits eru fjarska áhrifamiklir, enda lesnir út um allan heim. Blaðið segir að stundum hafi virkað eins og hagkerfið væri á leiðinni upp á við eftir kreppuna 2008, en það hafi sumpart verið falsvonir, en nú lítur út fyrir að efnahagsbatinn sé rauverulegur og það sem meira er, hans verður vart út um allan heim.
Nú sé í fyrsta sinn í langan tíma uppsveifla sem verður vart í Bandaríkjunum, Evrópu og Asíu. Bandaríska hagkerfið hafi bætt við sig störfum í 77 mánuði í röð, efnahagsástandið í Evrópu sé nú betra en nokkurn tíma síðan 2009 og meiri bjartsýni þar, ótti um yfirvofandi hrun í Kína hafi minnkað. Meira að segja lönd eins og Rússland og Brasilía séu ekki undanþegin, en bæði þessi lönd hafa átt í miklum erfiðleikum.
Hins vegar sé hið pólitíska andrúmsloft súrt. Þjóðremd viðhorf og lýðskrum sæki á, en hnattvæðingin eigi í vök að verjast. Uppsveiflan núna sé á engan hátt þjóðernispopúlistum að þakka, en þeir – og þá sérstaklega Donald Trump – gætu hins vegar reynt að eigna sér hana. Hugmyndir Trumps um skattalækkanir gætu líka reynst skaðlegar – og eins ef hann ætlar að leggja út í viðskiptastríð við Kína.
