Engar áætlanir eru uppi um vegtolla á helstu leiðum til og frá Reykjavík. Þetta sagði Sigurður Ingi Jóhannsson samgönguráðherra við RÚV í dag. Ríkisstjórnin fundaði í morgun um fjárlagafrumvarpið. Sigurður Ingi lagði áherslu á uppbyggingu innviða, samgöngumál, menntamál, og heilbrigðismál en hans áherslur í samgöngumálum eru öryggisþættir, til dæmis er varða einbreiðar brýr, en ekkert verði um vegtolla, sem forveri hans í starfi hafði hugmyndir uppi um.

„Það er ekki stafkrókur um veggjöld í stjórnarsáttmálanum,“

sagði Sigurður Ingi um vegtollaáætlanir fyrri ríkisstjórnar.

„Þær voru lagðar til hliðar sem og ýmsar aðrar álögur sem stóð til að leggja á bíla, þó svo við séum að taka upp græna skatta eins og kolefnisskatta.“

Gert er ráð fyrir að Alþingi komi saman um miðjan mánuð þar sem fjárlagafrumvarpið verður lagt fram.