Samanborið við önnur Evrópulönd, var vaktavinna á Íslandi fremur algeng árið 2016, en hlutfall þeirra sem hana stunduðu þá voru 26,1% launþega sem kemur Íslandi í níunda sætið í Evrópu og 7,6 prósentustigum yfir meðaltali Evrópusambandsríkjanna. Þetta kemur fram á vef Hagstofu Íslands.

 
Hlutfall launþega í vaktavinnu hefur því hækkað nokkuð frá árinu 2008, en þá unnu 20,6% vaktavinnu. Þá kemur fram að ekki var mælanlegur munur milli kynjanna árið 2016. Vaktavinna var langalgengust í yngsta aldurshópnum en árið 2016 voru 55,8% launþega á aldrinum 16–24 ára í vaktavinnu á Íslandi. Þar á eftir kom aldurshópurinn 25–34 ára með 25,6%. Ekki var tölfræðilega marktækur munur á hópum á aldursbilinu 35–64 ára. Innan þeirra hópa var hlutfallið sem vann vaktavinnu á bilinu 17,7% til 18,5%. Hlutfallið var lægst á meðal fólks 65 ára og eldra. Þá hefur hlutfall launþega í vaktavinnu aukist mest í tveimur yngstu aldursbilunum frá árinu 2008, úr 37,4% á meðal fólks 16–24 ára og úr 18,7% á aldursbilinu 25–34 ára.
Launþegar með háskólamenntun voru ólíklegri til að vinna vaktavinnu en launþegar með minni menntun. Árið 2016 voru um 11% launþega 25 ára og eldri með háskólamenntun í vaktavinnu. Hlutfallið var hæst á meðal þeirra sem höfðu lokið framhalds- eða starfsnámi, eða 27,5%, og hafði hækkað umtalsvert frá 2008, úr 19,6%. Þeir launþegar sem aðeins höfðu lokið grunnnámi og unnu á vöktum voru 21,8%.