Lilja Rafney Magnúsdóttir oddviti Vinstri grænna í Norðvesturkjördæmi segir að hún og fleiri þingmenn flokksins hafi sóst eftir því að verða ráðherra en hún sé ekkert ósátt. Þegar ljóst var að Vinstri græn fengju þrjú ráðherraembætti áttu margir von á að Lilja Rafney eða Ari Trausti Guðmundsson yrðu ráðherrar. Sú varð ekki niðurstaðan og Guðmundur Ingi Guðbrandsson formaður Landverndar og félagi í VG verður umhverfisráðherra utan þings, er það gert meðal annars til að lægja öldurnar innan þingflokks VG en tveir þingmenn flokksins samþykktu ekki stjórnarsáttmálann við Sjálfstæðisflokkinn og Framsóknarflokkinn.

Það var ákveðið að breikka þetta hjá okkur með því að taka formann Landverndar inn í þetta ráðuneyti, sem er mjög flott. Auðvitað sóttist ég, og fleiri, eftir því að verða ráðherra, það er ekkert leyndarmál,

segir Lilja Rafney í samtali við Eyjuna. Hún kveðst ekki vera ósátt:

Ég er ekki ósátt en eðlilega vilja flestir þingmenn sem setið hafa á þingi einhvern tíma fá að komast í hlutverk ráðherra. Það er bara eðlilegt. Menn eru líka að horfa til að breyta eitthvað vinnubrögðum og hafa þetta ekki eins og hefur verið í hundrað ár.

Margir úr röðum Pírata og Samfylkingarinnar hafa gagnrýnt Katrínu Jakobsdóttur og Vinstri græn fyrir að fara í samstarf með Sjálfstæðisflokknum, síðast þegar Vinstri græn og Samfylkingin voru ekki saman í ríkisstjórn eða stjórnarandstöðu var í stjórnartíð Samfylkingarinnar og Sjálfstæðisflokksins á árunum 2007 til 2009. Lilja Rafney segir að fortíðin muni ekki endurtaka sig:

Við erum Vinstri græn og við gerum ekki sömu mistök og Samfylkingin gerði á sínum tíma.