Smári McCarthy þingmaður Pírata segir að hann hafi það á tilfinningunni að fyrirhuguð ríkisstjórn Sjálfstæðisflokks, Vinstri grænna og Framsóknarflokks verði algjör steypa þar sem Sjálfstæðisflokkurinn muni fara með öll raunveruleg völd á meðan Vinstri græn sitji uppi með ábyrgðina:

Það á alveg eftir að koma í ljós hverskonar stjórn þetta verður, við að sjá stjórnarsáttmálann, úthlutun ráðherrasæta, og ýmislegt annað sem hefur verið ákveðið. Tilfinningin er sú að þetta verði algjör steypa, þar sem Sjálfstæðisflokkurinn fer með öll raunveruleg völd og VG situr uppi með alla raunverulega ábyrgð ─ svipað og fór fyrir Bjartri Framtíð síðast. En ég bíð með að fella dóm í bili,

segir Smári á Fésbók. Hann ætlar þó að vera bjartsýnn á að starfshættir þingsins verði bættir, en hann gagnrýndi síðustu ríkisstjórn harðlega fyrir slæm vinnubrögð á þinginu, þá sérstaklega í skipun dómara við Landsrétt:

Ég vona bara svo innilega að það verði einhver áhugi hjá þessari stjórn að láta af þeim ofbeldisháttum sem hafa tíðkast á þinginu, þar sem vond mál sem hugnast stjórnvöldum eru rekin í gegn með hamagangi og valdi án þess að gefa svigrúm fyrir eðlilegt samtal, jafnvel þegar um lögbrot er að ræða eins og þegar þáverandi (og kannski áframhaldandi?) dómsmálaráðherra, Sigríður Á Andersen, skipaði í Landsrétt.