„Ég sé að borgarstjóri fer nú stórum og telur sig vera að gera allt sem í sínu valdi stendur til að axla ábyrgð í húsnæðismálum. Þetta er sorglegt að horfa á. Fátækrar- og húsnæðisleysis umræðan er honum erfið eins og öðrum. En því miður getur hann ekki þvegið hendur sínar af þessum vanda enda hefur hann beinlínis stuðlað að þessari þróun,“ segir Áslaug Friðriksdóttir borgarfulltrúi Sjálfstæðisflokksins á Fésbók. Tilefni skrifa hennar eru viðbrögð Dags B. Eggertssonar borgarstjóra við vanda Gylfa Ægissonar og fleiri heimilislausra í Reykjavík.

Sjá einnig: Gylfi Ægisson heimilislaus í nístingskulda

Gylfi skoraði á Dag og Bjarna Benediktsson forsætisráðherra að bregðast við vandanum og sagði Dagur að verið væri að standsetja 144 íbúðir í Reykjavík og útbúa neyðarskýli í Víðinesi.

Sjá einnig: Dagur svarar Gylfa Ægis og stofnar neyðarhúsnæði: Finnst eðlilegt að senda öðrum sveitafélögum reikninginn

Gagnrýndi Dagur jafnframt önnur sveitarfélög sem séu ekki með nóg af félagslegu húsnæði og séu ekki með áform um að fjölga þeim, en margir sem eru heimilislausir í Reykjavík koma úr öðrum sveitarfélögum.

Áslaug segir að ef það væru nóg af íbúðum í borginni þá væri ekki þörf á að fjölga félagslegum íbúðum:

Félagslegt húsnæði er ekki ódýrt húsnæði, leiguverðið tekur mið af leiguverði á markaði. Húsaleigubætur og greiðsla sérstakra húsaleigubóta er óháð því hvort fólk býr í húsnæði í einkaeigu, eigu leigufélaga eða í eigu sveitarfélaganna (félagslegu húsnæði).

Guðfinna Jóhanna Guðmundsdóttir borgarfulltrúi Framsóknar og flugvallarvina og þingmaður Miðflokksins er sammála Degi að vandinn sé þjóðarskömm og að sveitarfélögin verði að leysa vandann saman:

Hins vegar er ég algjörlega ósammála honum að sú staða hafi verið ljós frá í sumar að talsverður fjöldi fólks væri í miklum húsnæðisvanda. Sú staða hefur verið augljós mjög lengi enda hafa um 1000 manns verið á biðlista eftir félagslegu húsnæði hjá borginni lengi.