Óhætt er að segja að starfsmenn danska upplýsingatæknifyrirtækisins IIH Nordic hafi brugðist vel við þegar forsvarsmenn fyrirtæksins ákváðu að taka upp fjögurra daga vinnuviku í stað hefðbundinnar fimm daga vinnuviku.

Starfsmenn vinna 30 klukkustundir í viku, þeir mæta í vinnuna á mánudagsmorgnum og vinnuvikunni lýkur svo síðdegis á fimmtudegi. Á því tæpa ári sem liðið er síðan tilraunin hófst hafa afköst starfsmanna aukist um 20 prósent og þá taka starfsmenn um helmingi færri veikindadaga sé miðað við tímabil áður en tilraunin hófst.

Fjallað er um þetta á vef Berlingske Tidende.

Upphaflega stóð til að tilraunin myndi vera til eins árs, en vegna þess hve vel hún gekk hefur verið ákveðið að framlengja þetta fyrirkomulag um óákveðinn tíma. Þetta þýðir að starfsmenn þurfa bara að vinna fjóra daga í viku, en ekki fimm eins og víðast hvar annars staðar hjá starfsfólki sem er í 100 prósent starfi.

Henrik Stenmann, stjórnarformaður IIH Nordic, segir við Berlingske að fyrirkomulagið hafi reynst einstaklega vel og í raun skipti engu máli hvort starfsfólk vinni fjóra eða fimm daga vikunnar; afköstin séu nánast þau nákvæmlega sömu. „Í eitt ár höfum við unnið 14 þúsund færri stundir en samt viðhaldið veltu og hagnaði fyrirtækisins,“ segir hann.

Fyrirtækið ákvað ekki einungis að fækka vinnustundum heldur var ákveðið að taka upp heilsusamlegra vinnuumhverfi. Þannig er boðið upp á hollari mat en áður í mötuneyti fyrirtækisins í hádeginu. Allt þetta hefur gert það að verkum að veikindadögum starfsfólks hefur snarfækkað.

Stenmann bætir því við að fyrirtækið hafi kennt starfsmönnum svokallaða promodor-tækni, en hún felur í sér að starfsmenn vinna af miklum ákafa í 25 mínútur í senn og taka sér svo fimm mínútna hlé á milli. Þetta virðist hafa gefið góða raun, svo góða að fyrirtækið mun halda þessu áfram.