Ken Paxton, æðsti embættismaður dómsmála í Texas í Bandaríkjunum, hvetur fólk til að koma vopnað í kirkju. Þessi ummæli lét Ken falla eftir að byssumaður, David Patrick Kelley, 26 ára, skaut 26 manns til bana í kirkju í smábæ nærri San Antonio í gær.

Skotárásin er sú mannskæðasta í Texas svo áratugum skiptir en auk þess að drepa 26 særðust 20, sumir lífshættulega. David er sagður hafa gengið inn í kirkjuna þar sem hann hóf skothríð á fólk af handahófi.

Paxton sagði í viðtali við fréttastofu Fox í gærkvöldi að fólk þyrfti að vera betur á varðbergi gagnvart hættulegum einstaklingum. Ein leiðin væri að bera á skotvopn á sér alltaf, líka þegar farið er í kirkju.

Paxton benti á að í Texas væri fólki heimilt að bera á sér skotvopn. Og á fjöldasamkomum, eins og í Texas í gær, sé alltaf sá möguleiki fyrir hendi að einhver fremji ódæðisverk. Benti hann á að ef fólk ber skotvopn á sér sé hægt að takmarka manntjón.

Þessi nálgun, að ein leiðin til að stöðva „slæman“ einstakling með skotvopn sé að láta „góðan“ einstakling fá skotvopn hefur verið gagnrýnd harðlega af andstæðingum skotvopnalöggjafarinnar í Bandaríkjunum.

National Rifle Association, valdamikil samtök byssueigenda í Bandaríkjunum, hafa bent á að nauðsynlegt sé að leyfa almenningi að bera skotvopn því þannig sé hægt að koma í veg fyrir fjöldamorð líkt og varð í Texas í gær. Hafa samtökin fullyrt að það gerðist „milljón“ sinnum á ári að góðhjartaðir byssueigendur kæmu í veg fyrir skotárásir. Þess er getið í umfjöllun Independent að ekkert renni stoðum undir þessar fullyrðingar samtakanna.