Víða á netinu sér maður dreift Twitter-færslu Óttarrs Proppé frá 3. apríl 2016. Óttarr segist reyndar sjálfur skilja gagnrýni sem hann verður fyrir og telur ekki undarlegt að fólk upplifi að hann sé kominn á „skrítinn stað“. Það er sagt í fjölmiðlum að ríkisstjórn Sjálfstæðisflokks, Viðreisnar og Bjartrar framtíðar verði kynnt í kvöld.

Eftir kosningar hefur myndast svo náið bandalag milli Óttarrs og Benedikts Jóhannessonar, formanns Viðreisnar, að það er varla að þeir sjáist án hvors annars. Þeir virka samt eins og mjög ólíkir menn, gamli pönkarinn og bóksalinn og silfurskeiðarmaðurinn úr Engeyjarættinni.

Það má samt rifja upp að Benedikt stóð og lamdi bumbur gegn síðustu ríkisstjórn á Austurvelli á tíma Panamauppnámsins og hér er ræða hans frá þeim tíma.

En þess er reyndar að gæta að þótt Óttarr hafi hingað til fremur verið spyrtur saman við vinstri flokkanna, þá var Björt framtíð ekki stofnuð sérstaklega til að starfa til vinstri. Það var eiginlega frekar eins og henni væri ætlað að vinna ýmist til hægri eða vinstri – svona líkt og uppfærð útgáfa Framsóknarflokknum. Stofnandi flokksins var jú afkomandi tveggja formanna og forsætisráðherra Framsóknarflokksins.

Þannig hefur Björt framtíð unnið með Samfylkingu, VG og Pírötum í borgarstjórninni í Reykjavík, en með Sjálfstæðisflokknum í bæjarstjórnum í Kópavogi og Hafnarfirði. Það verður að segjast eins og er að nú hefur þessi örlitli flokkur komið ár sinni býsna vel fyrir borð hvað varðar valdastöðu.

Það er hins vegar dálítið neyðarlegt í ljósi uppnámsins vegna Panamaskjalanna að Björt framtíð – og Twittermaðurinn Óttarr Proppé – séu að fara í ríkisstjórn með Sjálfstæðisflokknum á sama tíma og uppvíst er orðið að formaður hans stakk undir stól  skýrslu um aflandseignir Íslendinga og er í raun orðinn illa margsaga í því máli.

Þetta er ekki sérlega gæfuleg byrjun á ríkisstjórninni, og í rauninni gæti Óttarr þarna verið kominn með átyllu til að hætta við ellegar bíða þangað til málið skýrist betur. En samt er ekki líklegt að hann geri það.