Jón Sigurðsson, fyrrverandi formaður Framsóknarflokksins, gagnrýndi leiðaraskrif Morgunblaðsins um daginn í sjónvarpsviðtali á Hringbraut og sagðist ekki hafa séð eins harkalegar árásir fyrrverandi formanns stjórnmálaflokks á núverandi formann. Hann gerði ráð fyrir því að Davíð Oddsson héldi á penna í fyrrnefndum leiðara sem var árás á Bjarna Benediktsson. Í leiðaranum voru stjórnarmyndunarviðræður við Viðreisn harkalega gagnrýndar og mátti skilja leiðarann á þá leið að sjálfstæðismenn ættu að fara annað í stjórnarmyndunarviðræður. Frá þessu sagði Eyjan.is í þessari frétt fyrr í vikunni.
En í Staksteinum Morgunblaðsins slær Davíð Oddsson til baka og lætur Jón Sigurðsson ekki eiga neitt inni hjá sér. Staksteinar dagsins nefnast Muldrar í barminn:
Jón Sigurðsson segir að óviðeigandi sé að fyrrverandi formenn flokka hafi skoðun á því á hvaða leið þeir séu síðar. Jón er að tala upphátt við sjálfan…
Jón Sigurðsson segir að óviðeigandi sé að fyrrverandi formenn flokka hafi skoðun á því á hvaða leið þeir séu síðar.
Jón er að tala upphátt við sjálfan sig, eins og margir gera, en fæstir þó í fjölmiðlum.
Fyrir tveimur árum sagði sami Jón um gamla flokkinn sinn, Framsóknarflokkinn:
Flokkurinn er á villuleið – ekki aðeins í höfuðstaðnum og ekki aðeins í sveitarstjórnarmálum, segir Jón Sigurðsson fv. ráðherra, seðlabankastjóri og formaður Framsóknarflokksins sem kveðst ekki hafa getað kosið sinn gamla flokk um skeið.«
Þessi ágæti fyrrverandi formaður Framsóknarflokksins hefur ekki kosið flokkinn sinn um langt skeið. Það hljóta að vera mjög þung örlög fyrir fyrrverandi formann að treysta sér ekki til að kjósa flokkinn sinn í fjölmörgum kosningum.
Jón hefur vonandi kosið flokkinn þegar hann var sjálfur í framboði, en Jón er eini formaður alvöru stjórnmálaflokks sem náði aldrei inn á þing sem slíkur.
Aðeins er vitað um einn annan núlifandi fyrrverandi formann sem ekki hefur kosið flokkinn sinn upp á síðkastið.
Af hverju lætur Jón fjölmiðlunga komast upp með að kenna hann sífellt við Framsóknarflokkinn, sem hann er löngu hættur að kjósa?
