Fyrrum yfirmaður hjá rússnesku leyniþjónustunni fannst látinn í bíl sínum á annan dag jóla og voru kringumstæður dularfullar. Maðurinn, Oleg Erovinkin, kom að gerð skýrslu um Donald Trump þar sem því er haldið fram að Trump hafi náin tengsl við Rússland.

Breska dagblaðið Telegraph segir að Erovinkin hafi veitt upplýsingar sem voru notaðar í skýrslunni en hún vakti mikla athygli fyrr í mánuðinum en í henni er því haldið fram að Trump sé mjög náinn bandamaður Rússa og að Rússar hafi jafnvel töluverða stjórn á honum vegna ósæmilegra myndbandsupptaka sem hafi náðst af Trump í Rússlandi.

Segir þar jafnframt að Erovinkin hafi áður verið yfirmaður hjá KGB og hafi átt í góðu sambandi við Vladimir Pútín, forseta, og Igor Sechin, sem er forstjóri rússneska olíurisans Rosneft. Erovinkin er sagður hafa aðstoðað Christopher Steele, fyrrum starfsmanna bresku leyniþjónustunnar MI6, við gerð skýrslunnar.

Steele hefur verið í felum síðan skýrslan komst í hámæli en hann er sagður óttast mjög um líf sitt. Ekki hefur enn verið gefið út hvað varð Erovinkin að bana en ýmsir fjölmiðlar halda því fram að hann hafi verið tekin af lífi en aðrir segja að hjartaáfall hafi orðið honum að bana. Rússneska leyniþjónustan FSB er enn að rannsaka málið.