Er hugsanlegt að stjórnarandstaðan hafi gert mistök með því að fara í fýlu við kosningu í nefndir? Jú, það er gott að standa í lappirnar, en niðurstaðan er sú að stjórnarandstaðan fær ekki eina einustu nefnd. Og þannig gæti hún farið í gegnum heilt kjörtímabil.

En það má auðvitað spyrja líka hvort ríkisstjórnarflokkarnir hafi sýnt einhverja sérstaka sáttfýsi í málinu? Það hefði ef til vill mátt sýna aðeins meiri lipurð, ekki síst í ljósi þess hversu meirihlutinn í þinginu er tæpur.

Niðurstaðan er sú að Sjálfstæðisflokkurinn fær sex þingnefndir, þeir þingmenn hans sem fengu ekki ráðherraembætti, raða sér í formannsstólana í nefndunum. Viðreisn fær aðeins eina nefnd, utanríkismálnefndina en Björt framtíð fær formennsku í velferðarnefnd. Sjálfstæðisflokkurinn hefur semsagt tögl og hagldir í þinginu líkt og í ríkisstjórn – og eiginlega merkilegt hvað samstarfsflokkarnir hafa reynst meðfærilegir.

Kannski hefðu Viðreisn/BF þurft að leggja aðeins meiri áherslu á samstarf við stjórnarandstöðuna og þá ekki bara í ljósi fyrri fyrirheita, heldur líka til ákveðins mótvægis við Sjálfstæðisflokkinn. Þeir eru farnir að virka dálítið eins og dvergar í samanburði við hann.

Svo er varla hægt að segja að þetta boði gott um þingstörfin á næstunni og starfsfriðinn í þinginu.