Vladimír Pútín Rússlandsforseti segir það tilgangslaust að herða refsiaðgerðir á Norður-Kóreu og að þeir myndu frekar bíta gras en að hætta kjarnorkuáætlun sinni. Sameinuðu þjóðirnar hafa rætt um að herða refsiaðgerðir í kjölfar þess að Norður-Kóreumenn sprengdu vetnissprengju síðastliðinn sunnudag, um að er ræða mun öflugri sprengju en þeir hafa prófað hingað til og segjast þeir nú geta komið sprengju fyrir á langdrægri eldflaug.

Pútín sagði á fundi Briks-landanna, Brasilíu, Rússlandi, Indlandi, Kína og Suður-Afríku, í Kína í morgun að viðræður við Norður-Kóreu væru eina leiðin til að losa spennuna á Kóreuskaga. „Hernaðarmóðursýki“ myndi aðeins leiða til hörmunga:

Þeir myndu frekar borða gras en að hætta við kjarnorkuáætlun sína nema að þeim finnist að þein sé ekki ógnað. Og hvað minnkar ógn? Að endurreisa alþjóðalög. Við eigum að stuðla að samskiptum allra aðila,

sagði Pútín. BBC segir að Kínverjar séu á sama máli. Bandaríkjamenn og Suður-Kóreu hafa tekið harða afstöðu gegn eldflauga- og kjarnorkutilraunum Norður-Kóreu, er búið að setja upp eldflaugapalla í Suður-Kóreu og eru flugmóðurskip Bandaríkjamanna komin í viðbragðsstöðu. Nikki Haley sendifulltrúi Bandaríkjanna hjá SÞ segir að aðeins hörðustu refsiaðgerðir dugi til að þvinga Norður-Kóreumenn að samningaborðinu, Angela Merkel Þýskalandskanslari tók undir það í morgun og sagði að herða þyrfti refsiaðgerðir.