Efsta stétt Norður-Kóreu er langt frá því að vera jafn einangruð frá umheiminum og samlandar þeirra. Þó svo fáir sem engir Norður-Kóreumenn geti farið úr landi hefur efsta lag samfélagsins greiðan aðgang að netinu til að lesa erlendar fréttir, nota samfélagmiðla og jafnvel skoða klám. Þetta kemur fram í nýrri skýrslu vefleyniþjónustufyrirtækisins Recorded Future.

Norður-Kórea er yfirleitt lýst sem mjög einangruðu ríki. Sannleikurinn er hins vegar sá að valdastéttin í landinu er alls ekki einangruð,

segir Sheena Chestnut Greitens sérfræðingur í málefnum Norður-Kóreu hjá Brookings stofnuninni í samtali við tímaritið Vice. Rannsakendur fylgdust með vefþjónum Norður-Kóreu og teiknuðu upp netnotkunina í landinu.

Í ljós kom að margir Norður-Kóreumenn nota samskiptamiðilinn Facebook daglega, sama gildir um Twitter. Einnig lesa margir erlenda fréttamiðla. Aðeins er þó um að ræða alveg efsta lag samfélagsins, valdastéttin í Pyongyang.

Almennir borgarar eiga þess kost að eiga farsíma í gengum ríkissímafyrirtækið Koryolink, gert er ráð fyrir að stofnun sjái um að fylgjast með því sem almennir borgarar segja í símann og senda í SMS-skilaboðum. Aðgangur að tölvum er mjög takmarkaður, embættismenn, nemar og stúdentar geta komist á ríkisinternet Norður-Kóreu, Kwangmyong, þar sem allt er grandskoðað. Efsta lag samfélagsins er svo með fullan aðgang að netinu:

Valdastéttin eyðir miklum tíma á netinu og fylgist vel með popp-menningu Vesturlanda, heimsfréttunum og lífinu sem fólk utan Norður-Kóreu lifir. Leiðtogar Norður-Kóreu eru alls ekki einangraðir frá umheiminum, þeir vita hvað öðrum finnst um Norður-Kóreu og skilja vel hvaða áhrif landið hefur á heiminn,

segir í skýrslunni. Netnotkunin einskorðast þó ekki við samskiptamiðla og fréttalestur en 65% af allri netnotkuninni fer í myndbandaveitur og leikjavefi, er nefnt sérstaklega í skýrslunni að flestir spili leikinn World of tanks.